पूर्वाधार विकास कार्यालय स्याङजाको शिफारीसमा विरुवा गाउँपालिका–३, सिद्धवावाथानमा स्थापना भएको अस्थाई क्रसरबाट नियम विपरीत निर्माण कम्पनीले निर्माण सामाग्री वितरण गरेको पाईएको छ । अस्थाई क्रसर स्थापना गर्ने निर्माण कम्पनीले विरुवा गाउँपालिका र पुतलीबजार नगरपालिका भित्र निर्माण भएका विभिन्न योजनाहरुलाई सामाग्री वितरण गरेको पाईएको हो ।
पूर्वाधार विकास कार्यालय स्याङजाका प्रमुख इन्जीनियर दयाराम अधिकारीले यस बारे आफुलाई कुनै जानकारी नभएको प्रतिकृया दिए । उनले निर्माण कम्पनीले निर्माण सामाग्री वितरण भए नभएको अनुगमन गरी जिल्ला प्रशासन कार्यालय, जिल्ला समन्वय समिति र स्थानीय पालिकाले कारवाही गर्नुपर्ने भन्दै आफु तर्कन खोजे ।
यही बैशाखमा काम सक्ने गरी गणेशकुन्ज इन्द्रेणी रक्तकन्या जेभी नुवाकोटले राङखोला देखी धोवादी सडक खण्डको कालोपत्रेको कामको जिम्मा लिएको थियो । करिब १८ करोडको लागतमा निर्माण हुन लागेको उक्त सडकमा आवश्यक पर्ने निर्माण सामाग्रीको लागि पूर्वाधार विकास कार्यालयको अनुपतिमा क्रसर उद्योग स्थापना भएको थियो ।
गणेशकुन्ज इन्द्रेणी रक्तकन्या जेभी नुवाकोटका प्रतिनिधी ज्ञानराज घिमिरेले कालोपत्रेको लागि आवश्यक तयारी सकिसकेको बताउदै निर्माण सामाग्री विक्रि वितरण नगरेको दाबी गरे ।
विरुवा गाउँपालिका–३, सिद्धवावाथानमा राङखोला धोवादी सडक खण्डलाई आवश्यक पर्ने निर्माण सामाग्री उत्पादन गर्न अस्थाई क्रसरको लागि पूर्वाधार विकास कार्यालय स्याङजाले सिफारीस गरेको थियो । क्रसरको लागि गणेशकुन्ज इन्द्रेणी रक्तकन्या जेभी नुवाकोटलाई अनुमति दिएको थियो ।
पूर्वाधार कार्यालयले त्यहाँ रहेको क्रसरले निर्माण सामाग्री बाहिर विक्री वितरण नगर्ने जनाउदै संचालनको लागि विरुवा गाउँपालिकालाई सिफारीस गरेको थियो भने जिल्ला प्रशासन कार्यालय, जिल्ला समन्वय समिति र जिल्ला प्रहरी कार्यालयलाई वोधार्थ दिएको थियो ।
राेशन लामिछाने आँधिखोला एक्सप्रेस डटकमका अध्यक्ष हुन् ।
