कबि तथा गीतकार सागर बाबु (बुद्धिसागर लामिछाने)द्धारा लिखित जिन्दगीको रीत नामक गीतगजल संग्रह शनिवार स्याङ्जाको पुतलीबजार नगरपालिकामा विमोचन गरिएको छ । जिल्ला समन्वय समितिका प्रमुख श्रीप्रसाद जिटी, स्याङ्जा साहित्य प्रतिष्ठानका सभापति विश्वप्रेम अधिकारी, पुतलीबजार नगर कार्यवाहक प्रमुख मनोज पौडेलले संयुक्तरुपमा विमोचन गरेका हुन् ।
लोकार्पण कार्यक्रमका समन्वय प्रमुख जिटीले सागर बाबु निजामति सेवामा क्रियाशिल रहेर पनि कला र संस्कृतिप्रति देखाउनु भएको रुचि, प्रतिभा र सृजनाले स्याङ्जामा थप आयाम थपेको बताए । बाबुले आफ्ना सृजनालाई निरन्तरता दिन उनले सुझाव दिदै प्रचारप्रसारको अभावमा स्याङ्जाका कला संस्कृती हराएकोमा चिन्ता व्यक्त गरे ।
कार्यक्रममा पुतलीबजार नगरपालिकाका कार्यवाहक प्रमुख मनोज पौडेल, लक्ष्मी स्मृति पुस्तकालय, स्याङ्जा रेडियो एवं टेलिभिजनका अध्यक्ष ध्रुवबन्धु पौडेल, लगायतले शुभकामना सहित धन्यवाद ब्यक्त गरेका थिए । सोही कार्यक्रममा त्रिभुवन आदर्श बहुमुखी क्याम्पसका प्राध्यापक प्रमोद पंगेनीले कृतिमाथि समिक्षा र कृतीकार सागर बाबु (बुद्धिसागर लामिछाने)ले कृतिको सृजनाका बारेमा आ आफना धारणा ब्यक्त गरेका थिए ।
स्याङ्जा साहित्य प्रतिष्ठानका सभापति विश्वप्रेम अधिकारीको सभापतित्वमा सम्पन्न कार्यक्रमको संचालन साहित्यप्रेमी अनन्तकुमार श्रेष्ठले गरेका थिए । पुतलीबजार नगरपालिका वडा नं. ११ मा जन्मेका बुद्धिसागर लामिछाने संस्कृति पर्यटन तथा नागरिक उड्यन मन्त्रालयका वहालवाला सहसचिव हुन ।
संग्रहमा ४६ वटा गीत र १७ वटा गजल समावेश गरिएका छन्। बुद्धिसागर लामिछानेले सागर बाबुको नामबाट साहित्य क्षेत्रमा कलम चलाउदै आएका छन् । यसअघि पनि उनको गिती एल्बम सार्वजनिक भैसकेको छ । स्याङ्जा साहित्य प्रतिष्ठानको आयोजना तथा लक्ष्मी स्मृती पुस्तकालय, स्याङ्जा रेडियो र टेलिभिजनको समन्वयमा गीतगजल संग्रह लोकार्पण गरिएको थियो ।
राेशन लामिछाने आँधिखोला एक्सप्रेस डटकमका अध्यक्ष हुन् ।
